الجمعة، 2 سبتمبر، 2016

تجربتي مع التسوق الالكتروني وتجربة الشحن المباشرمن Macys.com


السلام عليكم 

كيفكوووم حبااايب <<< باللهجة العراقيه عسسسل مرة 

اليوم قررت اغير عن التدوينات اللي متعودين اكتب عنها من السفر والمطاعم 

حبيت اشاركم تجربتي في التسووق أون لاين 

# نبذة عن بداياتي في التسوق اون لاين ؟  
( كتبتها عشان الخبرة لها دور ههههه امزح بس منجد كتر التجارب تعلم أكثر )
بدايتي تقريبا من خمس سنوات
وحمدالله اوصفها انها كلها ناحجة سواء جودة في المنتج ومقاس وسعر 
استخدم فيزا سعودية + فيزا شحن وهيا الأفضل في بعض المواقع ( شبيهه بالpaypal ) 
في فيزا تسوق من بنك الراجحي كتير يستخدموها بس ما جربتها

شركات الشحن اللي استخدمها - اراميكس خدمة ( شوب أند شيب ) في البداية كان عندي حساب امريكي وبريطاني وحاليا في أكثر الدول بس ما قد جربت غير امريكا وبريطانيا 

الشحن المباشر حسب الموقع اذا موفر هاذي الخدمة ويتم دفع مبلغ الشحن الين يوصل لباب البيت

# ليش اشتري اون لاين ؟ 
بعض الماركات مهي موجودة عندنا
 أو تكون موجودة بأسعار مبالغ فيها من قبل الوكيل 
وجود قطع مميزه سواء موديلات ألوان 

# بعض المواقع اللي جربتها - وتقييمها 
amazon.com - الغني عن التعريف 
www.asos.com - ملابس ، اكسسوارات شنط و جزم ( الله يكرمكم ) - ممتاز 
https://colourpop.com - ميك اب - ممتاز
http://www.nyxcosmetics.com - ميك اب - ممتاز
http://www.monicavinader.com - اكسسوارات << ما عجبتني ابدا جودتها سيئة ووصلتني فيها نقط متغير لونها كأنها صدآ 
Mango.com <<< احلى تجربة الدفع عند الاستلام كانت تجربه بس عجبتني خدمتهم 
http://www.ralphlauren.com <<< ممتاز بس انتبهو للمقاسات لأنها امريكية يعني اكبر من المقاسات العادية 
https://www.net-a-porter.com <<< كانت متوفر عندهم مارك جيكوب بس حاليا لا ، اخذت شنطه ومحفظة من موسكينو من نفس الموقع والتجربة ممتازه

واخيييرا تجربتي مع موقع  Macys.com اللي راح اتكلم عنها بالتفصيل من الطلب الى الاستلام 

مميزات الموقع :
*موقع ميسيز يشحن مباشرة للسعودية برسوم وتوصل لباب البيت 
**يرسل كود تخفيض أول ما تدخل الموقع تحط الايميل ويجيك كود التخفيض         استخدام واحد الحلو حتى القطع المخفضه ينفع معاها الكود
***الماركات المتنوعه اللي فيه 
****موثوق إني استخدم فيزتي بدون ما اخاف انها تتهكر 


خطوات الطلب :

(١) 

من صفحة الموقع الرئيسية في اخر الصفحة في دا البوكس 
نختار تسجيل بواسطة الايميل Sign up for E 



تتفتح هادي الصفحة نعبي البيانات 


 (٢)
الخطوة ال٢ نختار الشحن الدولي 
  Shipping To 
تنفتح هادي الصفحة ونختار الدولة والعملة وحفظ 


( لازم تسوو الخطوة هادي مهمه مررره التسوق بالدولار ارخص لكن يحتاج فيزا امريكية
واذا حابين تشحنو مباشر للبيت بدون صندوق بريد امريكي لازم تكون العمله مطابقه للبلد اللي توصل لها الشحنه )

(٣)

قبل ما ابدأ بالتسووق اروح اشييك على الايميل 

وهادا ايميل الترحيب يجيك كدا مع كود التخفيض 
وشحن مجاني ازا كنت في امريكا بشرط توصل لمبلغ معين <<< حلوة للمبتعثين اللي في مدن جامعية ومافيها اسواق

(٤)
دخلت الموقع حددت البلد عشان يعطيك السعر بالريال
** كنت محدده ايش احتاج ومن ايت ماركة 
اخترت شنط - من خانة البراند اخترت مايكل كورس 


(٥)
عشان ما اتشتت اخترت كمان ستايل الشنط اللي راح تنعرض بما اني مقرره الشكل 


(٦)
نجي لنقطة جدا مهمه في اختيار القطعه 
ممكن اسماء القطع تختلف تسميتها في البوتيكات من المواقع حسب حجمها ، أوالشكل ما يكون موضح على عارضه أو مانيكان عشان نعرف حجمها بالنسبة للجسم اذا مناسبة او لا <<< كثير اشوف بنات يطلبو شنط اولان لاين ويخيب ظنهم في الحجم ويبيعوها وبكدا يخسرو سعرها
في تفاصيل تكون تحت كل قطعه ( Product Detallis ) هنا يكون مكتوب ابعاها 
(٧)
بعد كدا نختار اللون وعدد القطع المطلوبة وعلى Add to bag 


(٨)
  شيك اوت وننتقل على صفحة الدفع وخيارات الشحن 

نعبي بيانات الشحن 
اسمك 
وعنوان البيت لأنهم راح يوصلوها للباب ( الشارع - الحي - اقرب معلم ) <<< بس مو صيدلية النهدي ههههههه
المدينة 
الايميل 
وبس 

حتلاحظو في تفاصيل السعر زاد المبلغ 
١- حسبو الشحن حسب الشركة المختارة 
٢- الضرايب 

بس على فكرة السعر ارخص بكتير مع اضافة البرومو كود 




في شركتين للشحن المباشر هما بيستخدموها 
اراميكس  وهيا الارخص ١٢٠ <<< وهادي اللي اخترتها 
دي اتش ال اغلى تقريبا ب ١٥٩ ريال 

هنا بيانات الدفع 
نوع البطاقة اللي يقبلوها 
تسجلي الرقم الطويل اللي على البطاقه 
وتاريخ الانتهاء
والرقم السري تلاقيه خلف البطاقه اخر ٤ ارقام 


اذا عنوان البطاقة حقت البنك مختلف عن عنوان البيت راح تشيلي الصح
اللي باللون الأزرق وتكتبي العنوان الثاني بدي الطريقة 




وبس مبرووووووك راح يوصلك ايميل 




آآآآآخر شي راح يوصل ايميل فيه Tracking Number: FW-E4X0010306551 أو رقم تتبع الشحنة بمجرد ما تضغط عليه ينقلك على صفحة الشحن وتشوف التفاصيل وصورة القطعة 







في انتظار الشحنه *ـ*

أول ما توصل الشحنه على السعودية راح يوصلك ايميل من اراميكس انهم استلموها 

>>>> وصلتتتت <<<<<


شوفو كيف مهتمين بالتغليف  وحاطين اوراق اضافيه عشان ما ينضغط جلد الشنطه



الشركات الواثقه من منتجاتها ترسلك نموذج الترجيع مدفوع اعادة الشحن عشان لو في مشاكل في القطع او ماعجبتك ترجعيها <<<< قد سارت ليا مشكله مع مونيكا فندر ومارضيو الا اني ارسلها على حسابي نظامهم سيء ومنتجاتهم مهي بجودة السعر اللي ادفعو <<< باين مقهورة منهم



>>> نجي للمهم <<<

الشنطه صغنونه مرة تنفع للاستخدام اليومي اذا حاجاتك مو كتيره 
وطبعا عمليه جدا للسفر 
وتنشال بأكثر من طريقه 

طبعا عارفين ان الموضه في الشنط الفتره هادي باك باق ( شنط الظهر ) 
وكل الماركات تقريبا منزلين الموديل دا بس اللي عجبني في مايكل كورس 
ان الاستراب او الحزام اللي على الظهر يتفك ويتغير حسب احتياجك في اللبس 

ونفس الموديل في منو حجمين حجم شنطتي الميني
وفي اكبر ما يتغير الاستراب تبعها

صور للقطعه الجميله 
حبيت اصورها على المانيكان عشان تعرفو حجمها بالنسبة للجسم 
لأنو صورها في موقع ميسيز القطعه لحالها بدون مقارنه مع الجسم
عموما في اكتر من صور لدا الموديل في الموقع الرسمي للبراند يعني ما حسيت اني اتلخبطت في الحجم وفي ميسيز موضحين الحجم بالانش



تسير كروس *ـ* 


كروس بطريقه تانية بس تخلي الحزام بشكل مايل 

صورتلكم الشنطه قبل ما استخدمها *ـ* <<< كيف بس وانا اشاركم أول بأوول هههه شوفو التاق لسى عليها

حجمها بالنسبة لليد



تجي مع الشنطة الديست باق ( كيس الحفظ القماش ) 


وبس ان شاء الله عجبتكم تجربتي 
تقديراً للمجهود المبذول ادعولي بظهر الغيب 
ولو عجبكم الموضوع انشروه 






الخميس، 25 أغسطس، 2016

حياة صحية : مطعم بوقا سوبرفودس​ - Boga super foods


السلام عليكم

أول تدوينة من "سلسلة من تدوينات حياة صحية " زي ما وعدتكم في التدوينة السابقة إني راح اختار مطاعم زرتها تقدم أكل صحي واكتب تجربتي عنها وتكون زي المرجع لكم .

تجربة زيارتي لمطعم بوقا سوبر فودس



 


المطعم يقدم ( ساندويشات ، سلطات ، عصيرات ) كلها بشكل صحي وأغلب المنتجات من انتاجهم الخاص طبعا الشي دا موضح في المنيو 

في جلسات في المطعم عائلية وأفراد المكان شرح ووسيع الجو تبعو كاجول مهو فخم ولا زي جلسات الفاست فود 

أول ما تدخل عادي مافي أحد يستقبل زي أي مطعم مأكولات سريعه 
المنيو موجود على الطاولة 



تختار وتروح تسوي الطلب على الكاشير وتدفع وتجلس والويتر اللي يجب الطلبات
بعدها يجي الويتر ويقدم لك زي الضيافه ( فشار ) 



الطلبات تقدم بشكل بسيط مافيها تكلف ، بس الحلو إنهم يقدمو طقم صحون وملاعق وشوك مهو بلاستيك

 الطلبات :
طلبنا ٣ أنواع ساندويشات 
١- مكون من ٤ أنواع جبن مشوية
٢- ستيك 
٣- دجاج بالبيستو 

سلطة ايطالية 

عصير برتقال 











تقييم الطلبات : 



* سلطة طلبنا نوع اسمو الوعاء الايطالي شي ممتاز والصوص اللي عليها خفيف مافيه مايونيز ولغوصه 
السلطة حجمها كبير تكفي ٣ أشخاص 

**تجي الساندويشات في خبز زي الفرنسي أبيض ، مقسومه نصين عجبني عشان لا تحوس وانت تاكل وحلو لو ما تبغاه تاخدو تيك اوي وهوا نضيف ومرتب
الجبن ما ذقتو بس الهازبيند قال انو شي خطير والأنواع مع بعض مررره ممتازه وينفع فطور 




ستيك مررره لزيز عجبني ذقت اللحم لحالو عشان كان فيه جبنه صفرا، للأمانه أنا ماحب ساندويشات اللحم غالبا بس دا ممتااااز واللحمه طرية .


نجي للطلب الاخير دجاج بالبيستو دا الشي خرااااافي مررررره لزيز بشكل مو طبيعي اعطيه ١٠٠٪ 

واخر شي عصير برتقال فريشش لزييييييز بدون اضافات *ـ*

........................................................

في المنيو جنب كل طلب في مؤشر يعطيك القيمة الغذائية لكل طلب ( فكرة ممتازه )


الايجابيات :
الطعم فريييش مررره والنكهات موزونه 
التنوع في المنيو يخدم جميع الأذواق حتى النباتيين يقدرو يزوره ويطلبو ساندويشات مو بس سلطات
الاسعار جدا مناسبة بالنسبة للجودة اللي بيقدموها 
ماعندهم حلويات هههههه وأنا اعتبرو شي ايجابي مستبدلينها بسلطة فواكة

العيوب :
ما يوفرو اختيارات للخبز المقدم أسمر أو حبوب أو خالي من الجلوتين <<< هادي الحاجات صارت مهمه في عالم الغذاء الصحي 
وبما إنهم لسى في بداياتهم ماقدمو لنا ورقة اقراحات أو ملاحظات نسجل فيها عشان يتطور المكان للأفضل 
ماعندهم توصيل

تقييم عام : 
الجلسات العائلية يبغالها شوية اهتمام  دخلنا والجلسات الكبيرة مهي مرتبة رغم المكان فاضي 
في المقابل جهة الأفراد كان مرررره مرتب وأحلى دخلت اتفرج واصور وعجبني أكتر 

فكرة الديكور البسيط الكاجول مسيطرة على المكان وهيا تعكس فكرتهم كمان عن الأكل البسيط
عجبتني فكرة الثلاجات اللي عارضين فيها الخضروات اللي تتقدم 



وجدار الاعشاب جدا حلو ومبتكر 


المكان بصفه عامه ممتاز ويستاهل التجربة وعن نفسي راح اعتمدو 


وباقي الأكل أخدناه تيك أوي ودا شكل الباكج تبعهم << يعطيك فكرة لو طلبت الأكل برا كيف يجي مرتب 



أوقات دوامهم : 
من ٧ صباحا - الفطور 
الى ١ بعد منتصف الليل 

موقعم :
شارع الأمير سلطان بعد دوار التاريخ باتجاه الشمال 

حسابهم في الانستقرام :




وبس *ـ*



انتظر اراءكم .



السبت، 6 أغسطس، 2016

حياة صحية بدون تعقيد




 ‬السلام عليكم 

كيفكم ان شاء الله طيبين ؟

زي منتو عارفين مدونتي أكتب فيها عن تجاربي للطعام و خصوصا المطاعم الجديدة .

الفترة الاخيرة انفتحت مطاعم كتير بجدة 
وطبعا انا من محبي التجارب الجديدة وتقييم المطاعم 

بس بحكم ( الحمية الصحية ) اللي مسويتها ف مرررة قللت من موضوع الريفيو والتقييمات ، بعدين حسيت انو الشي دا غلط لأني حرمت نفسي من شي احبو اني اكتب عن المطاعم واصور اطباقي ، لأني بروح صح بس طلباتي بتكون في نطاق صحي ومابجرب كل شي .

قررت اني ارجع اكتب و اساعد الناس اللي حابيين يحافظو على صحتهم ووزنهم بدون ما يحسو انهم محرومين من الطلعات والمطاعم وخصوصا في الجمعات حقت الاهل والصحبات يتحمس الواحد ويطلب ويخرب نظامه ، او ممكن يتنكد وما يطلع بسبب انو خايف يخرب الدايت .

اول شي حمدالله من يوم ما بدأت نظامي الصحي ماحرمت نفسي من شي اطلع وانبسط بس في خطوط حمرا ما اعديها عشان استفيد وانبسط . 

تاني شي نظامي الصحي خلاني اشوف منيو المطاعم بطريقة مختلفه عن اول
 ( كنت اركز على المقبلات اللي اغلبها مايكون مقلي ) او الحاجات اللي فيها كريمة وتكون تقيله على المعده وسعراتها عاليه .

ثالث شي في حاجتين مستحيل اطلبها ولا ادوق منها ولا اشارك احد بصحنو
 ( الحلا )

 الغازيات أو العصيرات ماعدا الطبيعي واطلبها بدون سكر



أو أي طبق مقلي 

اكلمكم شوية عن نظامي : 
ابدأ طلبي بشوربة بس ماتكون فيها كريمة ، أو سلطة بصوص الليمون وزيت الزيتون أو البلسميك ولو فيها نوع بروتين يكون افضل
(فيه مطاعم يكون متوفر بار سلطة تقري تختاري الحاجات اللي حابتها وتتحكمي في الصوص المضاف)



بِعدت عن المقبلات لأنو اغلبها مقليات 


الطبق الرئيسي حاولت يكون مشوي عالي البروتين قليل النشويات او الكاربوهيدرات وياسلام لو في اختيار اني استبدلها بخضار مشوية .

الاطباق اللي تكون بكريمة وطن جبنه بعدت عنها نهائيا كلها حتكون دهون وسعرات عاليه 

التكنيك وقت الأكل : 
حاولت امضغ الأكل بشويش وأخلي دقيقتين الى تلانه قبل ما أرفع اللقمه التانية لفمي كدا قننت اكلي و شبعت بسرعه 
في الأول كنت اطفش لأني اطوول بعدين سار الموضوع عادي

أول ما أحس بالشبع أوقف حتى لو صحني مليان أخده تيك اوي لو نفسي فيه ، أو اتصدق فيه منها اجر وحافظت على صحتك .

افضل شي ما اكل واشرب تقريبا اتنازلت عن العصير 
وأكافئي نفسك بقهوة بعد ٣ ساعات من الاكل ترا ممكن أنسي وكدا افضل هههههه 

خففت من منتجات الألبان والأجبان الكاملة الدسم استبدلتها بقليلة الدسم أو فات فري ( حتى في طلبي للقهوة وطبعا بدون سكر وكريمة )

القهوة مع الحليب كثرتها تثبت الوزن وتسوي سولاليت في الجسم رغم اني مدمنة قهوة بس خليتها مرة الى مرتين في الاسبوع اطلع برا عشانها بس في البيت لا


وبكده مافي حرمان ومافي يوم مفتوح نخرب كل اللي اشتغلنا عليه *ـ*

وان شاء الله راح اصورلكم اطباقي في زيارتي لكل مطعم ولو المطعم يوفر منيو صحي حشاركم فيه 
منها نتشارك ونحمس بعض على الأكل الصحي بدون حرمان
( صور التدوينه من تصويري *ـ* فقط لإثراء الموضوع )
ترقبو البوست القادم عن مطعم فيه منيو صحي وحصورلكم المنيو كامل *ـ*

واللي تصور صحنها تمنشني عليه على حسابي في الاستغرام @maram_ghurab 

و عساكم العافيه 

وبس